Пажар у Асіповічах: жанчына пераблытала бутэлькі з сокам і бензінам ля газавай пліты

Увечары нядзелі гарэла кватэра па вул. Чарняхоўскага: 56-гадовая гаспадыня адкрыла бутэльку з бензінам каля ўключанай газавай пліты, паведаміла МНС.

Паведамленне аб пажары ратавальнікі атрымалі 2 красавіка ў 20:59 ад сына пацярпелай. На месцы яны ўбачылі задымленне на кухні. На той момант жанчына знаходзілася на лесвічнай клетцы і сказала, што акрамя яе ў кватэры нікога не было.

Высветлілася, што асіпаўчанка пераблытала пластыкавыя бутэлькі з сокам і бензінам. У выніку адбылася ўспышка пароў, жанчына атрымала апёкі рук і твару. Таксама на кухні пашкоджана маёмасць, закураны сцены і столь.

Эвакуацыя жыхароў пад'езда не праводзілася. Асіпаўчанку шпіталізавала брыгада хуткай медыцынскай дапамогі.

Фота ў навіне: МНС

Чытайце навіны Асіповічаў у нашым тэлеграм-канале: